چۆنیەتی دروست کردنی باسوق بەشێوەیەکی خۆماڵی

باسوق چیە ؟

باسوق شیرینیەکی سروشتی کوردەواری زۆر خۆشە کە لە ترێ دروست دەکرێت ئەوەیە کە لە وێنەکەدا دەیبینیت

ئایا چۆن دروست دەکرێت ؟

تۆزێک ئیش کردنەکەی قورسە بەڵام هەم خۆشە و هەم پاکو خاوێنە .

١٠ کیلۆ ترێ یان زیاتر بەڵام من لەسەر ١٠ کیلۆ ترێ قسە دەکەم هەنگاو بە هەنگاو

١- ١٠ کیلۆ ترێ بۆڵ بۆڵ دەکەیتە ناو شتێکی گەورەوە بۆ نموونە مەنجەڵێک یان تەشتێکی پاک

٢- دەیگوشیت بە باشی و تڵپەی تەڕی پێوە ناهێڵێت .

٣- دەی پاڵێویت بە هێڵەکی ئارد بێژانەوە .

٤- چنگێک یان بڵێین ١٠٠ گرام گڵی دۆشاوی تێ دەکەیت .

گڵی دۆشاو چیە ؟

گڵی دۆشاو گڵێکە لە شاخ هەیە ئەوانەی لە لادێ ژیاون دەزانن لە کوێ هەیە ، لەوانەیە لە بازاڕەکانی تایبەت بە فرۆشتنی داودەرمانە کوردەواریەکان هەبێت . ئەم گڵە دەوری ئەوەیە کە ترشێتی بۆڵە ترێ پێ نەگەیشتوەکان لە ناو گوشراوەکە ناهێڵێت شیرینی دەکات . دوای ١٠ خولەک بیپاڵێوە دوبارە .

٥- گوشراوەکە دەخەیتە سەر ئاگر تا دەکوڵێت پاشان دەبینیت کەف دەکات ، ئەم کەفەی لێ بگرە بە تەواوی جا بە هێڵەک بێت یان کەوچک دوای ئەوە با بۆ ٥ خولەکی تر بکوڵێت .

٦- دایبگرە با کەمێک سارد ببێتەوە دڵنیابە ئەم هەنگاوە جێ بەجی بکەیت .

٧- پاش کەمێک سارد بوونەوە (٧٠ پلەی سیلیزی ) ٢٥٠ گرام (ڕوبعە کیلۆیەک) ئاردی سفری پیا بچێنەو بە باشی تێکی بدە ، ئاگاداربە مەهێڵە ئاردەکە کڵۆ کڵۆ ببێت .

٨- گرنگترین هەنگاوە و دەبێت بە بەردەوامی لە سەر سەری مەنجەڵەکە بیت چونکە کە گەرم بوو یەکسەر خەست دەبێتەوە وەک محەلەبی دەبێت تێکی بدەیت بە کەوچکێکی دریژ (با بڵێی کەوچکی گەورەی ماستاو) ، دوای خەست بوونەوە نابێت دایبگریت بە بەردەوامی دەبێت تێکی بدەیت و نابێت بۆ چرکەیەکیش لێی غافڵ بیت چونکە بن دەگرێت و دەسوتێت ، وەلحاڵ ١ کاتژمێری تەواو دەبێت بەردەوام بیت لە تێکدانی دەبینیت گوشراوەکە بە باشی خەست بۆتەوە و وەک چکلێتی شلی لێ هاتوە و جیڕ بۆتەوە ، بۆ دڵنیا بونی زیاتر دەتوانیت بە کەوچکەکە تۆزێکی بکەیتە سەر سینیەک و پاش تۆزێک سارد بونەوە بزانە بەری دەدات ، بە هەر حال ١ کاتژمێری تەواوی دەوێت بۆ تێکدان .

٩- سەرچاوەی ئاگرەکە بکژێنەوە و دایبڕێژە بۆ ناو سینیەکە ئەگەرزۆرتر بوو بیکەرە سینیەکی ترەوە .

تیبینی : دەتوانیت پێش ئەوەی دایبڕێژیت قاپێک گوێزی تێ بچێنیت کە خۆشتر دەبێت ، یان دەبێت پێشتر کاکڵە گوێزت بە پەتەوە کردبێت پەتەکەی تێ هەڵکێشە لەم بارەدا ناوی دەبەن بە ( سجوق ) نەک ( باسوق ) ، یان دەتوانیت کە دات ڕشت خێرا گوێزەکە بکە بەسەریا و پەنجەیەکیان سەرخە با بنی کاکڵەکەی تیا نقوم بیت .

١٠- پاش ١٠ کاتژمێر کە لە ناو سینیەکەدایە بە چەقۆ بیکە بە پارچەی ٤ گۆشەی بچووکەوە پاش ڕۆژێک لە وشک بونەوە دەتوانیت ئەم پارچانە هەڵبگێڕیتەوە هەندێکی بگوازیتەوە سەر سینیەکی تر یان نان وەشێنیکی دار بۆ ئەوەی باشتر هەوا لیی بدات و زوو وشک ببیتەوە ، دەبێت چەند ڕۆژێک لەسەر ئەم سینیانە بمێنیتەوە جا لەبەر هەتاو بێت باشترە و زووتر وشک دەبێتەوە .

١١- کە وشک بوەوە دەیخۆیت زۆر خۆش و زۆر بەتامە .

بە هیوای چێژ بینین

ئەگەر بە دڵت بو بابەتەکە شەیر بکە با هاوڕێکانیشت بیبینن و ئەم زانیاری کلتوریە بمێنێتەوە .

سەرچاوە : خۆم ، خۆشم لە دایکمەوە دایکیشم لە عەشرەتەوە .

ئەم بابەتە وەک خۆی لە پرۆفایلی (هێمن کەریم) ەوە وەرگیراوە

چەند وێنەیەکی کاتی دروستکردنی باسوق لە فەیسبووکەوە وەرگیراوە