زیره‌كی منداڵ په‌یوه‌ندی به‌ شیری دایكه‌وه‌ نییه‌

تویژنه‌یه‌وه‌یه‌كی به‌ریتانی ئه‌و بڕوایه‌ی پوچه‌ڵكرده‌وه‌ گوایه‌ زیره‌كی
منداڵ په‌یوه‌ندی به‌ شیردانی سروشتییه‌وه‌ هه‌یه‌، به‌هۆی سووده‌
خۆراكییه‌كانی شیری دایك، به‌ڵكو ئه‌وه‌ی ده‌رخستووه‌ زیره‌كی منداڵا
به‌شێوه‌یه‌كی راسته‌وخۆ په‌یوه‌ندی به‌ زیره‌كی دایكه‌وه‌ هه‌یه‌ نه‌ك به‌
شیره‌كه‌یه‌وه‌..
ژماره‌یه‌ك زانای به‌ریتانی زانكۆی ساوسهامبتۆن له‌ توێژینه‌وه‌یه‌كی نوێدا
كه‌ له‌رۆژنامه‌ی "تایمزی"ی به‌ریتانی بڵاویان كرده‌وه‌، ئه‌وه‌یان
روونكردووه‌ته‌وه‌ كه‌ هیچ به‌ڵگه‌یه‌ك له‌به‌رده‌ستدا نییه‌ بۆ گرێدانی
زیره‌كی مندال به‌شیردانی سروشتی دایكه‌وه‌، وه‌كو پێشتر باو بووه‌. به‌ڵام
جه‌ختیان له‌وه‌ش كردووه‌ته‌وه‌ كه‌ "ده‌بێت تا ته‌مه‌نی 6 مانگی منداڵ
ته‌نها شیری دایكی بدرێتێ".
كاترین غێل پزیشك له‌سه‌نته‌ری "زانستی په‌تاكان" و سه‌رۆكی ئه‌و تیمه‌
زانستیه‌ی توێژینه‌وه‌كه‌ی ئه‌نجامداوه‌، رایگه‌یاند: ئه‌و توێژینه‌وه‌یه‌
یارمه‌تیده‌ر ده‌بێت بۆ نه‌هێشتنی هه‌ندێك چه‌مكی خورافی سه‌باره‌ت به‌
ترشه‌ڵۆكی ئۆمیگا 3 كه‌ به‌چڕی له‌شیری دایكدا هه‌یه‌.
غێل وتیشی: "ئێمه‌ ئه‌وه‌ ده‌زانین ترشه‌لۆكه‌كه‌ به‌چڕی له‌شیری دایكدا
هه‌یه‌ و به‌كه‌می له‌شیری وشككراوه‌ی قوتودا هه‌یه‌، ده‌شزانین
ترشه‌ڵۆكه‌كه‌ سوودی زۆری هه‌یه‌ بۆ ته‌ندروستی منداڵان، به‌ڵام كاریگه‌ری
ئه‌فسوناوی له‌سه‌ر زیره‌كی منداڵا نییه‌".
لای خۆیه‌وه‌ د.جۆن رۆبنسۆن به‌شداربوو له‌توێژنه‌وه‌كه‌ وتی:
"توێژینه‌وه‌كانی پێشوو كه‌ ده‌گه‌ڕێنه‌وه‌ بۆ ساڵانی بیسته‌كانی سه‌ده‌ی
رابردوو، ده‌ریانخستبوو ئه‌و منداڵانه‌ی شیری دایكیان خواردووه‌ زیره‌كتر
بوون، به‌ڵام له‌راستیدا مه‌سه‌له‌كه‌ زیاتر په‌یوه‌ندی به‌ باكگراوندی
خێزانه‌كه‌وه‌ هه‌یه‌ كه‌ منداڵه‌كه‌ په‌روه‌رده‌ ده‌كه‌ن، نه‌ك به‌ شیری
دایكه‌كه‌وه‌".